kuchh haqīqat to huā kartī thī insānoñ meñ
vo bhī baaqī nahīñ is daur ke insānoñ meñ
vaqt kā sail bahā le gayā sab kuchh varna
pyaar ke Dher lage the mire gul-dānoñ meñ
shāḳh se kaTne kā ġham un ko bahut thā lekin
phuul majbūr the hañste rahe gul-dānoñ meñ
un kī pahchān kī qīmat to adā karnī thī
jāntā hai koī apnoñ meñ na begānoñ meñ
sar hī ham phoḌne jaa.eñ to kahāñ jā.eñge
khokhle kāñch ke but haiñ tire but-ḳhānoñ meñ