kyuuñ jeb meñ mullā mirī taqdīr liye hai
kyuuñ raah kā har moḌ koī piir liye hai
kartā hai shab-o-roz jo sarkār kī tārīf
ye shaḳhs bhī shāyad koī jāgīr liye hai
sar ek bhī maiñ ne yahāñ ūñchā nahīñ dekhā
pāgal hai jo ab haath meñ shamshīr liye hai
har peḌ se aatī hai mire dost kī ḳhushbū
har phuul mire shoḳh kī tasvīr liye hai
ik ajnabī miltā hai baḌe pyaar se 'aḳhtar'
kyā vo bhī koī hasrat dil-gīr liye hai