ahl-e-ulfat ke havāloñ pe hañsī aatī hai

lailā majnūñ kī misāloñ pe hañsī aatī hai

jab bhī takmīl-e-mohabbat kā ḳhayāl aatā hai

mujh ko apne hī ḳhayāloñ pe hañsī aatī hai

log apne liye auroñ meñ vafā DhūñDte haiñ

un vafā DhūñDne vāloñ pe hañsī aatī hai

dekhne vaalo tabassum ko karam mat samjho

unheñ to dekhne vāloñ pe hañsī aatī hai

chāñdnī raat mohabbat meñ hasīñ thī 'fākir'

ab to bīmār ujāloñ pe hañsī aatī hai