uñgliyāñ pher rahā thā vo ḳhayāloñ meñ kahīñ
lams mahsūs huā hai mire bāloñ meñ kahīñ
ab mirā saath nahīñ detā piyāda dil kā
haar jā.ūñ na maiñ aa kar tirī chāloñ meñ kahīñ
is tashaḳhḳhus pe bhī rahtā hai ye dhaḌkā dil ko
kho na jā.ūñ maiñ tire chāhne vāloñ meñ kahīñ
ek sūraj ne mujhe chāñd kā rutba baḳhshā
varna hotī maiñ kitāboñ ke havāloñ meñ kahīñ
mujh ko lagtā to nahīñ vo mutazalzal lekin
is ko vahshat hī na le jaa.eñ ġhazāloñ meñ kahīñ