mat samajhnā ki sirf tū hai yahāñ

ek se ek ḳhūb-rū hai yahāñ

pur hai bāzār-e-husn chehroñ se

jaane kis kis kī aabrū hai yahāñ

kaise ābād ho ye vīrāna

vahshat-e-kizb chār-sū hai yahāñ

aañkh kī putliyoñ ko ġhaur se dekh

terī tasvīr hū-ba-hū hai yahāñ

kaise tārīḳh likkhī jā.egī

sirf talvār aur gulū hai yahāñ

tū kahāñ hai ḳhabar nahīñ ai dost

raat din terī guftugū hai yahāñ

jhāñktā kaun hai girebāñ meñ

ā.īna kis ke rū-ba-rū hai yahāñ

maqtal-e-ārzū hai dil 'vājid'

har tamannā lahū lahū hai yahāñ