balā.eñ lījiye ab bārishoñ kī
jinhoñ ne laaj rakkhī mausamoñ kī
badan kī zardiyāñ miTne lagī haiñ
zarūrat hai ġhamoñ kī āñdhiyoñ kī
agar ghaTtī rahīñ raushan lakīreñ
siyāhī phail jā.egī shaboñ kī
mohabbat kār-farmā ho rahī hai
mileñgī lazzateñ ab ranjishoñ kī
akelī zaat ghabrāne lagī hai
talab baḌhne lagī hai sāthiyoñ kī
libās-e-jāñ shikasta ho gayā hai
ināyat hai qarībī dostoñ kī