zinda rahte hue zindagī chhoḌ dī
ik ḳhushī ke liye har ḳhushī chhoḌ dī
us ne tārīkiyoñ meñ jo chhoḌā mujhe
maiñ ne aisā kiyā raushnī chhoḌ dī
aisā chhoḌā ki saarā jahāñ luT gayā
haañ maiñ zinda rahā āshiqī chhoḌ dī
maiñ to patthar nahīñ aadmī huuñ miyāñ
kyoñ mire naam kī dushmanī chhoḌ dī
ranj-o-ġham se milāyā thā tū ne mujhe
tū batā dard meñ kyoñ kamī chhoḌ dī
jab bulāyā mujhe merī miTTī ne to
maiñ bhī tanhā chalā be-ruḳhī chhoḌ dī