samajh rahe the ki ab āsmān barsegā
ye soch kab thī ki vo mehrbān barsegā
vo vaqt duur nahīñ jab zamīn vāloñ par
makān TūTegā aur lā-makān barsegā
tumhāre zulm kī āñdhī meñ sar uThāte hue
tumhāre sar pe har ik be-zabān barsegā
gumān kahtā hai merā ki ek din mujh par
tirī vafā tirī chāhat kā maan barsegā
kisī kī aas meñ tanhā jo diip jaltā hai
use bujhāne ko ik imtihān barsegā