jab bhī tanhā.ī ke ehsās se ghabrātā huuñ
maiñ har ik chiiz meñ tahlīl sā ho jaatā huuñ
maiñ kisī jism pe pheñkā huā patthar to na thā
bār-hā apnā lahū dekh ke sharmātā huuñ
raat jo kuchh mujhe detī hai sahar se pahle
vaqt ke gahre samundar meñ utaar aatā huuñ
din ke hañgāme jilā dete haiñ mujh ko varna
sub.h se pahle ka.ī martaba mar jaatā huuñ
ek nashshe kī tarah TuuT gayā huuñ ḳhud se
apne nazdīk bhī mushkil se nazar aatā huuñ