qalb-gah meñ zarā zarā sā kuchh
zaḳhm jaisā chamak rahā thā kuchh
yuuñ to vo log mujh hī jaise the
in kī āñkhoñ meñ aur hī thā kuchh
thā sar-e-jism ik charāġhāñ sā
raushnī meñ nazar na aayā kuchh
ham zamīñ kī taraf jab aa.e the
āsmānoñ meñ rah gayā thā kuchh
dūsroñ kī nazar se dekheñge
dekhnā kuchh thā ham ne dekhā kuchh
kuchh badan kī zabān kahtī thī
āñsuoñ kī zabān meñ thā kuchh