bahut dinoñ meñ kahīñ rāste badalte the
vo log kaise the jo saath saath chalte the
vo kār-gah na rahī aur na vo sifāl rahī
ḳhudā ke daur meñ kyā aadmī nikalte the
zarā se rizq meñ barkat bhī kitnī hotī thī
aur ik charāġh se kitne charāġh jalte the
guzārne kī vo sūrat qayām-e-ḳhvāb meñ thī
jahāñ se aur ka.ī rāste nikalte the
falak pe apnā baserā thā aur ham aksar
falak ke āḳhirī kone pe jā nikalte the