kuchh aur din abhī is jā qayām karnā thā

yahāñ charāġh vahāñ par sitāra dharnā thā

vo raat niind kī dahlīz par tamām huī

abhī to ḳhvāb pe ik aur ḳhvāb dharnā thā

agar rasā meñ na thā vo bharā bharā sā badan

rañg-e-ḳhayāl se us ko tulū karnā thā

nigāh aur charāġh aur ye asāsa-e-jāñ

tamām hotī huī shab ke naam karnā thā

gurez hotā chalā jā rahā thā mujh se vo

aur ek pal ke sire par mujhe Thaharnā thā