charāġh hāthoñ ke bujh rahe haiñ sitāra har rah-guzar meñ rakh de
utaar de chāñd us ke dar par siyāh din mere ghar meñ rakh de
kahīñ kahīñ koī rabt-e-maḳhfī ibārat-e-muntashar meñ rakh de
gurez par haiñ nishān saare taraf bhī koī safar meñ rakh de
talab talab ā.ina-sifat hai ḳharāb-o-ḳhasta haiñ aks saare
ye nekiyāñ bhī haiñ sar-barahna latāfat-e-ḳhair shar meñ rakh de
nashāt-āvar hai ye udāsī kā ek uḌtā huā sā lamha
mabādā tāq-e-rajā ho vīrāñ sharāra ik chashm-e-tar meñ rakh de
ye sarf-o-hāsil-gazīda duniyā na din hī mere na merī rāteñ
kahāñ talak dekhtā hī jā.ūñ samā.ateñ kuchh nazar meñ rakh de
mire ḳhudā mere jism-o-jāñ ke ḳhudā mire haath jhaḌ na jaa.eñ
duā tah-e-sañg-e-lab gaḌī hai asar zarā sā asar meñ rakh de
badan hai yā qila-e-havā hai kahīñ se aa.uuñ kahīñ se jā.ūñ
hazāroñ raḳhne paḌe hue haiñ uThā ke dīvār dar meñ rakh de