vo tavānā.ī kahāñ jo kal talak aazā meñ thī
qahat-sālī ke dinoñ meñ terī yaad aatī rahī
ek be-ma.anī sī saa.at ek lā-yānī ghaḌī
jism ke ujḌe khañDar meñ ek arsa ban ga.ī
ek jhaTkā sā lagā maiñ TukḌe TukḌe ho gayā
us kī āñkhoñ se nashe kī teġh mujh par gir paḌī
jis pe mere ḳhuun kī vāzeh shahādat naqsh thī
mere qātil kī vo sābit āstīñ bhī phaT ga.ī
chār-dīvārī ke gahre ġhaar meñ soyā thā maiñ
aur ik āvāz samtoñ meñ bikhar kar rah ga.ī