husn hai maġhrūr dil saudā.ī hai
ishq aur nafrat meñ hāthā-pā.ī hai
dhaḌkanoñ meñ kar diyā paidā fasād
har adā meñ terī ik balvā.ī hai
ham ne ḳhud dekhī hai dast-e-ġhair meñ
terī to tasvīr bhī harjā.ī hai
vajd āñkhoñ meñ hai baasī niiñd kā
vasl kī jab se karam-farmā.ī hai
tum ko dekhe bin guzarnā chheḌ thā
dil pe mat lo dāġh-e-dil dukh-dā.ī hai
dil-lagī hai ibtidā-e-dilbarī
chāhatoñ meñ chheḌ-chhāḌ achchhā.ī hai
kitnī sharmīlī hai 'mannān' us kī yaad
dard ke parde meñ chhap kar aa.ī hai