zā.iqe paidā tabī.at meñ lachak karte haiñ
aa tujhe vāqif-e-qand aur namak karte haiñ
aao chalte haiñ jahāñ sāzish-e-ahbāb na ho
dushmanī kā ye safar dostī tak karte haiñ
vo jo insān ke hī bas meñ hai us par insāñ
jaane kis muñh se shikāyāt-e-falak karte haiñ
khulne hī vaalā hai bas andhī aqīdat kā bharam
ham se kuchh log bahut chhān-phaTak karte haiñ
shirk to ḳhvāb meñ bhī ham se nahīñ ho saktā
ham to yā-rab tirī qudrat pe bhī shak karte haiñ