ye kaisī kashmakash hai zindagī meñ
kisī ko DhūñDte haiñ ham kisī meñ
jo kho jaatā hai mil kar zindagī meñ
ġhazal hai naam us kā shā.erī meñ
nikal aate haiñ aañsū hañste hañste
ye kis ġham kī kasak hai har ḳhushī meñ
kahīñ chehra kahīñ āñkheñ kahīñ lab
hamesha ek miltā hai ka.ī meñ
chamaktī hai añdheroñ meñ ḳhamoshī
sitāre TūTte haiñ raat hī meñ
sulagtī ret meñ paanī kahāñ thā
koī bādal chhupā thā tishnagī meñ
bahut mushkil hai banjāra-mizājī
salīqa chāhiye āvārgī meñ