maiñ apne iḳhtiyār meñ huuñ bhī nahīñ bhī huuñ

duniyā ke kārobār meñ huuñ bhī nahīñ bhī huuñ

terī hī justujū meñ lagā hai kabhī kabhī

maiñ tere intizār meñ huuñ bhī nahīñ bhī huuñ

fihrist marne vāloñ kī qātil ke paas hai

maiñ apne hī mazār meñ huuñ bhī nahīñ bhī huuñ

auroñ ke saath aisā koī mas.ala nahīñ

ik maiñ hī is dayār meñ huuñ bhī nahīñ bhī huuñ

mujh se hī hai har ek siyāsat kā e'tibār

phir bhī kisī shumār meñ huuñ bhī nahīñ bhī huuñ