phir goyā huī shaam parindoñ kī zabānī
aao suneñ miTTī se hī miTTī kī kahānī
vāqif nahīñ ab koī samundar kī zabāñ se
sadiyoñ kī masāfat ko sunātā to hai paanī
utre koī mahtāb ki kashtī ho tah-e-āb
dariyā meñ badaltī nahīñ dariyā kī ravānī
kahtā hai koī kuchh to samajhtā hai koī kuchh
lafzoñ se judā ho ga.e lafzoñ ke ma.ānī
is baar to donoñ the na.ī rāhoñ ke raahī
kuchh duur hī hamrāh chaleñ yādeñ purānī