ik lamha bhī guzārūñ bhalā kyuuñ kisī ke saath
guzre tamām umr mirī aap hī ke saath
jab haath dostī kā baḌhāyā ḳhushī ke saath
us ne mujhe qubūl kiyā ḳhush-dilī ke saath
dil se kiyā hai yaad use maiñ ne jab kabhī
iz.hār-e-hijr kartī haiñ āñkheñ namī ke saath
ik baar mere yaar ne aisā kiyā mazāq
allāh re na ho kabhī aisā kisī ke saath
is tarah munsalik huā urdu zabān se
miltā huuñ ab sabhī se baḌī ājizī ke saath
baaqī rahī hai dil meñ ye hasrat tamām umr
'mahtāb' kā dayār ho us kī galī ke saath