kuchh is adā se mohabbat-shanās honā hai

ḳhushī ke baab meñ mujh ko udaas honā hai

maiñ aaj sog manānā sikhāne vaalā huuñ

idhar ko aa.eñ jinheñ mahv-e-yās honā hai

nashist-e-rūh meñ pākīzgī hai shart magar

badan kī bazm meñ bas ḳhush-libās honā hai

maiñ ḳhud hī hotā huuñ apnī nashāt kā baa.is

so mujh ko ḳhud mire ġham kī asaas honā hai

azal se merī hifāzat kā farz hai un par

sabhī dukhoñ ko mere ās-pās honā hai

ye āshiqī tire bas kī nahīñ so rahne de

ki terā kaam to bas nā-sipās honā hai