suulī pe jaan aTkī hai martā marīz huuñ

zaḳhmoñ se lutf letā anokhā marīz huuñ

bāteñ mohabbatoñ kī mire sāmne na kar

tū jāntā bhī hai ki maiñ dil kā marīz huuñ

pāgal kiyā hai ishq ne aadhā jo rah gayā

ab aadhe sar ke dard kā puurā marīz huuñ

phir merā Thiik hone ko dil hī nahīñ kiyā

us ne mujhe kahā thā maiñ achchhā marīz huuñ

vo ḳhush hai merī zāhirī hālat ko dekh kar

us ko ḳhabar nahīñ ki maiñ kitnā marīz huuñ

tum dostoñ ke vāste be-shak baḌā sahī

us kī nazar meñ maiñ abhī chhoTā marīz huuñ

bīmār-e-karbalā ke hai sadqe shifā milī

maulā se jā ke pūchheñ maiñ kaisā marīz huuñ

pahle bhī mere gaañv meñ ghāyal haiñ tiin shaḳhs

āzār āgahī kā maiñ chauthā marīz huuñ

us ne 'hasīb' mujh ko masīhā samajh liyā

maiñ ne hazār baar kahā thā marīz huuñ