kaun samjhegā mire ba.ad ishāre us ke
TuuT kar ḳhaak meñ milte haiñ sitāre us ke
ab hameñ aañkh uThā kar nahīñ taktā vo shaḳhs
kitne mazbūt marāsim the hamāre us ke
jo samundar mire atrāf ravāñ hai sar-e-ḳhāk
DhūñDhtā rahtā huuñ din-rāt kināre us ke
us kā nuqsān haqīqat meñ mirā apnā hai
mere hisse hī meñ aate haiñ ḳhasāre us ke
kitnī āsānī se dekhā thā use patthar meñ
kitnī mushkil se ḳhad-o-ḳhāl sañvāre us ke
saut meñ jitnā ḳhalā hai use pur kar de sadā
is tasalsul se koī naam pukāre us ke
ḳhatm ho saktī hai 'az.har' ye laḌā.ī apnī
ab bhī kuchh log salāmat haiñ hamāre us ke