kuchh nahīñ qīl-o-qāl meñ ai dost
mast rah apne haal meñ ai dost
zindagī us kā zikr sunte hī
aa ga.ī ishti.āl meñ ai dost
saañs lenā muhāl hai yuuñ bhī
aur aise vabāl meñ ai dost
kis qabīle ke log haiñ ham log
ḳhush haiñ ya.anī zavāl meñ ai dost
terī sūrat dikhā.ī paḌtī hai
kyā ġhazal kyā ġhazāl meñ ai dost
yād-e-māzī meñ umr kaT jaa.e
ḳhaak hai māh-o-sāl meñ ai dost
sach kahūñ to javāb rakkhā hai
aap hī ke savāl meñ ai dost
koī 'mahmūd' sā agar hai to
pesh kiije misāl meñ ai dost