ab darmiyāñ koī bhī shikāyat nahīñ bachī
ya.anī qarīb aane kī sūrat nahīñ bachī
ab aur koī sadma nahīñ jhel saktā maiñ
ab aur merī āñkhoñ meñ hairat nahīñ bachī
ḳhāmoshiyoñ ne apnā asar kar diyā shurūa
ab rishte ko sadā kī zarūrat nahīñ bachī
har samt sirf baat mohabbat kī hai ravāñ
ya.anī jahāñ meñ aaj mohabbat nahīñ bachī
fursat ke vaqt ishq se mahrūm maiñ rahā
phir aisā vaqt aayā ki fursat nahīñ bachī