bahut mushkil huā rasta hamārā
jab us ne kho diyā naqsha hamārā
milā jab raushnī se muddatoñ baad
lipaT kar ro paḌā saaya hamārā
bahut mahdūd hai duniyā hamārī
nahīñ nibh pā.egā rishta hamārā
agarche koī bhī aatā nahīñ thā
khulā rahtā thā darvāza hamārā
nahīñ is meñ mohabbat ke sivā kuchh
bahut hai muḳhtasar qissa hamārā
hamārī koī qīmat hī nahīñ hai
nahīñ kar pāoge saudā hamārā
na jaane kaun dastak de gayā hai
na jaane kaun hai apnā hamārā
tumheñ apnā banāyā bol kar jhuuT
kaho kaisā lagā dhoka hamārā