yuuñ sañg-dil hayāt se ahd-o-vafā kiyā
dīvār darmiyāñ thī magar ḳhud ko vā kiyā
miTTī kā rañg-o-nūr se rishta qadīm thā
har baar zindagī ne nayā tajraba kiyā
the dastaras meñ yuuñ to sab asrār-e-kā.enāt
is umr-e-bevafā ne magar nā-rasā kiyā
har ajnabī maqām se tanhā guzar ga.e
apnā hī naqsh-e-pā thā jise rahnumā kiyā
chamkā diyā lahū ne dil-e-tīra-jism ko
ik sail-e-nūr thā ki ragoñ meñ bahā kiyā
dānista luT gayā ye saman-zār dekhnā
phūloñ ne nik.hatoñ ko sipurd-e-sabā kiyā
ye raat raushnī kī tamannā meñ bujh ga.ī
dil ko ye kis shikast ne be-mudda.ā kiyā
yuuñ to jahāñ tamām hai tūfān-e-rañg-o-nūr
kis ābshār ne hameñ rañgīñ-navā kiyā