ham jahāñ rahte haiñ ḳhvāboñ kā nagar hai koī

is ḳharābe meñ na dīvār na dar hai koī

jā basā thā jo kisī hijr ke sahrā meñ kabhī

ai havāo kaho is dil kī ḳhabar hai koī

sūrat-e-mauj-e-sabā log idhar se guzre

ye to anjānī havāoñ kī Dagar hai koī

hijr-e-dīdār bhī mahrūmī-e-dīdār bhī hijr

jo kabhī ḳhatm na ho aisā safar hai koī

maiñ ki andar se pighaltā hī chalā jaatā huuñ

mere yaḳh-basta badan meñ bhī sharar hai koī

ye fazā raas nahīñ dasht-mizājoñ ke liye

is saman-zār meñ patthar hai na sar hai koī

jism aur jaañ kā ye āzār ye mahshar 'akbar'

kisī andesha-e-bātin kā asar hai koī