shaam yuuñ dal ke kināre se guzar jaatī hai
jaise lakḌī koī aare se guzar jaatī hai
maiñ use yaad kī baisākhiyāñ lā detī huuñ
shab apāhij hai sahāre se guzar jaatī hai
ishq meñ donoñ jahāñ apne hī kahlāte haiñ
baat phir mere tumhāre se guzar jaatī hai
zindagī jitnī bhī dushvār huuñ rāheñ lekin
aap ke ek ishāre se guzar jaatī hai
maiñ ne logoñ se sunā hai ki vo pāgal laḌkī
hañstī rahtī hai ḳhasāre se guzar jaatī hai
maiñ tujhe dekh ke an-dekhā bhī kar saktī huuñ
aañkh muḌtī hai nazāre se guzar jaatī hai