miTTī ne jab ḳhauf ugānā siikh liyā
īñToñ ne dīvār chabānā siikh liyā
muñh par bhuuk tamāñche khā kar baiThī hai
bhūkoñ ne kachre se khānā siikh liyā
yaar ab mujh ko chhoḌ ke tū jā saktā hai
maiñ ne ḳhvāboñ ko dafnānā siikh liyā
jitnī gahrī chup hai utnī āvāzeñ
ḳhāmoshī ne shor machānā siikh liyā
miTTī par uñglī se miTTī likh denā
maiñ ne apnā dil bahlānā siikh liyā
andar kā dukh bāhar le kar ā.ūñgī
maiñ ne bhī tasvīr banānā siikh liyā