ḳhudā nasīb kare jis ko sohbateñ merī
na bhuul paa.e kabhī vo hikāyateñ merī
kahāñ ga.e mirī masrūf sā.atoñ ke rafīq
sadā.eñ detī haiñ ab un ko fursateñ merī
tamām shahr gurezāñ hai aaj kal jaise
kisī ke naam na lag jaa.eñ tohmateñ merī
ḳhudā kā shukr ki maiñ ḳhud-shanās huuñ varna
samajhtā kaun pur-asrār ādateñ merī
maiñ apnī zaat ke sahrā meñ kho gayā 'kausar'
mirī nazar se bhī ojhal haiñ vus.ateñ merī