ye badalte hue manzar nahīñ dekhe jaate
dast-e-ahbāb meñ ḳhanjar nahīñ dekhe jaate
dekhe jaate haiñ faqat fat.h-e-mubīñ ke sapne
jañg meñ kaTte hue sar nahīñ dekhe jaate
ye mohabbat hai kisī se bhī ye ho saktī hai
is meñ tañg-dast-o-tavañgar nahīñ dekhe jaate
apne miTTī ke diyoñ par hī qanā.at kar lo
roz sūraj ke ye tevar nahīñ dekhe jaate
aap kā ghar hai ye āñkheñ to inhīñ meñ rahiye
aap in āñkhoñ se bāhar nahīñ dekhe jaate