sar-e-mahfil tamāshā apnā banvānā nahīñ achchhā
jahāñ izzat na miltī ho vahāñ jaanā nahīñ achchhā
tire aane se maiñ ḳhush huuñ tire jaane se afsurda
tirā aanā to achchhā hai magar jaanā nahīñ achchhā
hamīñ se kahte ho dīvāngī achchhī nahīñ hotī
kabhī zulfoñ se bhī kah do ki bal khānā nahīñ achchhā
maza to tab hai jab puurī tarah se hosh kho baiThe
jise apnī ḳhabar ho aisā dīvāna nahīñ achchhā
koī pyāsā taḌaptā hai koī sairāb hotā hai
are saaqī tirā dastūr-e-mai-ḳhāna nahīñ achchhā