niilā ambar chāñd sitāre bachchoñ kī jāgīreñ haiñ
apnī duniyā meñ to bas dīvāreñ haiñ zanjīreñ haiñ
rishte haiñ parchhā.īñ jaise ummīdeñ haiñ sarāboñ sī
bantī haiñ miTtī haiñ pal pal ye kaisī tasvīreñ haiñ
baḌh kar haiñ shaitānoñ se bhī insānoñ ke kaam yahāñ
hoñToñ par phūloñ sī bāteñ hāthoñ meñ shamshīreñ haiñ
ye kaisā insāf hai yārab kaisā khel hai qismat kā
kuchh hāthoñ meñ rañg-e-hinā hai kuchh meñ sirf lakīreñ haiñ
'āzim' pyaar kī nagrī se kuchh ḳhvāb churā kar le aao
us nagrī meñ sunte haiñ kuchh rāñjhe haiñ kuchh hīreñ haiñ