guzre vaqtoñ kī vo tahrīr sambhāle hue haiñ
dil ko bahlāne kī tadbīr sambhāle hue haiñ
bāñdh rakkhā hai hameñ jis ne abhī tak jānāñ
ham mohabbat kī vo zanjīr sambhāle hue haiñ
dekhte rahte haiñ ajdād ke chehre jis meñ
ham vafāoñ kī vo tasvīr sambhāle hue haiñ
jin lakīroñ meñ nujūmī ne kahā thā tū hai
donoñ hāthoñ meñ vo taqdīr sambhāle hue haiñ
vasl kī shab meñ jo dekhe the sunahrī sapne
un kī ham aaj bhī tadbīr sambhāle hue haiñ