firāq-mausam ke āsmāñ meñ ujaaḌ taare juḌe hue haiñ
nadī ke dāman meñ hansrājoñ ke sard lāshe gire hue haiñ
chamakte mausam kā rañg phailā thā jis se āñkheñ dhanak huī thiiñ
aur ab basārat kī narm miTTī meñ thuur kāñTe uge hue haiñ
tire darīche ke ḳhvāb dekhe the raqs karte hue dinoñ meñ
ye din to dekho jo aaj niklā hai dast-o-pā sab kaTe hue haiñ
ḳhumār kaisā thā ham-rahī kā shumār ghaḌiyoñ kā bhuul baiThe
tire nagar ke faqīr ab tak us ek shab meñ ruke hue haiñ
use adāvat thī us sabā se jo mere chehre ko chhū guzartī
vo ab nahīñ hai to apne āñgan meñ lū ke Dere lage hue haiñ
rahoge thāme yūñhī ye chaukhaT agarche ik bhī nazar na Dālūñ
hañsāo mat ghar ko lauT jaao ye raag mere sune hue haiñ
kahāñ ruke the vo kyā shajar the ki jin ke saa.e meñ ham khaḌe the
vo dhuup kaisī thī jis kī bārish se mere sahrā hare hue haiñ