sho.ala hī sahī aag lagāne ke liye aa

phir nuur ke manzar ko dikhāne ke liye aa

ye kis ne kahā hai mirī taqdīr banā de

aa apne hī hāthoñ se miTāne ke liye aa

ai dost mujhe gardish-e-hālāt ne gherā

tū zulf kī kamlī meñ chhupāne ke liye aa

dīvār hai duniyā ise rāhoñ se haTā de

har rasm-e-mohabbat ko miTāne ke liye aa

matlab tirī aamad se hai darmāñ se nahīñ hai

'hasrat' kī qasam dil hī dukhāne ke liye aa