dhuup ko kuchh aur jalnā chāhiye
jism kā saaya pighalnā chāhiye
chīTiyāñ chalne lagī haiñ piiTh meñ
ab tumhārā tiir chalnā chāhiye
god suunī ho chalī hai aañkh kī
ab to koī ḳhvāb palnā chāhiye
ġham bayāñ ho pyaas kā kuchh is tarah
ret se paanī nikalnā chāhiye
bandagī kī lau ho aisī jis meñ ki
sañg-e-marmar tak pighalnā chāhiye
ham badan kī bandishoñ se duur haiñ
ruuh meñ tum ko bhī Dhalnā chāhiye
ab zabāñ tak aa ga.iiñ hai talḳhiyāñ
ab hameñ fauran nikalnā chāhiye