shīsha-sifat the aap aur shīsha-sifat the ham

bikhre hue se aap haiñ bikhre hue se ham

us ne thamā dī haath meñ ik bāñsurī hameñ

patthar uThā ke haath meñ dene lage the ham

maujūd hai tirī tarah vo paas bhī nahīñ

kaise kaheñ ye baat ab pāgal havā se ham

har shaḳhs thā tirī taraf terī hī bazm thī

kis ko sunāte phir tire qisse jafā ke ham

terī kisī murād kī ḳhātir mire raqīb

gir jaa.eñ āsmān se haiñ vo sitāre ham