nazar meñ vo utāre jā rahe haiñ
muqaddar yuuñ sañvāre jā rahe haiñ
ai dariyā ham tumhārā saath deñge
jahāñ tak bhī kināre jā rahe haiñ
jinheñ pahle Duboyā jā chukā hai
vahī phir kyuuñ ubhāre jā rahe haiñ
zarā namkīn paanī se sunā hai
diloñ ke zañg utāre jā rahe haiñ
qayāmat jis jagah TuuTī thī ham par
vahīñ se phir guzāre jā rahe haiñ
hilā.ī thī kabhī zanjīr ham ne
sunā hai ab pukāre jā rahe haiñ