tumhāre lams ko ḳhud maiñ utaar saktā huuñ
maiñ apne aap ko yuuñ bhī sañvār saktā huuñ
vo saañs saañs meñ ghulne lagā hai yuuñ mere
maiñ por por se us ko pukār saktā huuñ
mire ḳhayāl kī tāqat se tum nahīñ vāqif
zamīn par maiñ falak bhī utaar saktā huuñ
mire mizāj kī shiddat se tum to vāqif ho
tumheñ maiñ apnā banā kar bhī haar saktā huuñ
agar jo izn-e-mohabbat mujhe mile 'sā.im'
maiñ rome rome tirā bhī nikhār saktā huuñ