pattharoñ par naqsh ubhrā kyuuñ nahīñ

dast be-tesha ne sochā kyuuñ nahīñ

jaan levā haiñ adhūre vāqi.āt

jo bhī honā hai vo hotā kyuuñ nahīñ

pattharoñ ke aks paḌ kar rah ga.e

shīsha-e-ehsās TuuTā kyuuñ nahīñ

bah rahā thā jab lahū āvāz kā

ye gulū-e-ḳhushk bolā kyuuñ nahīñ

maut bhī kyā sāya-e-dīvār thī

us kā kūcha ham se chhūTā kyuuñ nahīñ

ā.ina-ḳhāna thā maiñ phir koī aks

is taraf se ho ke guzrā kyuuñ nahīñ

log nā-ḳhush haiñ ki apne haal par

muskurā detā ho huuñ ronā kyuuñ nahīñ