phūñk deñge mire andar ke ujāle mujh ko
kaash dushman mirā qindīl banā le mujh ko
ek saaya huuñ maiñ hālāt kī dīvār meñ qaid
koī sūraj kī kiran aa ke nikāle mujh ko
apnī hastī kā kuchh ehsās to ho jaa.e mujhe
aur nahīñ kuchh to koī maar hī Daale mujh ko
maiñ samundar huuñ kahīñ Duub na jā.ūñ ḳhud meñ
ab koī mauj kināre pe uchhāle mujh ko
tishnagī merī musallam hai magar jaane kyuuñ
log de dete haiñ TuuTe hue pyāle mujh ko