merā bhī har añg thā bahrā us kā jism bhī gūñgā thā

varna aapas meñ kahne-sunñe ko jaane kyā kyā thā

mere andar se jo mujh meñ diip jalāne niklā thā

jaane kitnī baar vo apne hī saa.e se uljhā thā

is ghar ke chappe chappe par chhāp hai rahne vaale kī

mere jism meñ mujh se pahle shāyad koī rahtā thā

koī pyāsā mil jaa.e to phir lahreñ le saktā huuñ

ab maiñ ġham se suukh gayā huuñ pahle maiñ bhī dariyā thā