kabhī gokul kabhī rādhā kabhī mohan ban ke

maiñ ḳhayāloñ meñ bhaTaktī rahī jogan ban ke

har janam meñ mujhe yādoñ ke khilaune de ke

vo bichhaḌtā rahā mujh se mirā bachpan ban ke

mere andar koī taktā rahā rasta us kā

maiñ hamesha ke liye rah ga.ī chilman ban ke

zindagī bhar maiñ khulī chhat pe khaḌī bhīgā kī

sirf ik lamha barastā rahā sāvan ban ke

merī ummīdoñ se lipTe rahe andeshoñ ke saañp

umr har daur meñ kaTtī rahī chandan ban ke

is tarah merī kahānī se dhuāñ uThtā hai

jaise sulge koī har lafz meñ īñdhan ban ke