ye dil meñ vasvasa kyā pal rahā hai
tirā milnā bhī mujh ko khal rahā hai
jise maiñ ne kiyā thā be-ḳhudī meñ
jabīñ par ab vo sajda jal rahā hai
mujhe mat do mubārakbād-e-hastī
kisī kā hai ye saaya chal rahā hai
sar-e-sahrā sadā dil ke shajar se
barastā duur ik bādal rahā hai
fasād-e-laġhzish-e-taḳhlīq-e-ādam
abhī tak haath yazdāñ mal rahā hai
diloñ kī aag kyā kaafī nahīñ hai
jahannam be-zarūrat jal rahā hai