is ke aage pyaar ke jazboñ kī ārā.ish na kar

zard registān meñ phūloñ kī afzā.ish na kar

ye to ho saktā hai ki donoñ kī manzil ek ho

phir bhī us ke ham-safar hone kī farmā.ish na kar

munhasir us par bhī hai vo paas aa.e yā na aa.e

ai mire dil qurbatoñ kī mujh se farmā.ish na kar

ham ne maanā chāñd sā raushan tirā mahbūb hai

tū magar us chāñd kī lafzoñ se paimā.ish na kar

ḳhud pe jo nāzāñ hai 'anvar' terī chāhat par nahīñ

us parī-paikar ke aage dil kī zebā.ish na kar