ḳhisht-e-jāñ darmiyān laane meñ
umr lagtī hai ghar banāne meñ
aaj phir chāñd der se niklā
tum ne phir der kar dī aane meñ
itnā nam-dīda thā libās-e-vajūd
dhuup kam paḌ ga.ī sukhāne meñ
dekh kar tum ko hairatī huuñ maiñ
kis qadar husn hai zamāne meñ
phir piyāle meñ aag lag ga.ī hai
kaun aayā sharāb-ḳhāne meñ
merī nazroñ ne is ko nazm kiyā
vo magan thī ġhazal sunāne meñ
muztarib bhī huuñ mutma.in bhī huuñ
apnī ġhazloñ ko ḳhud jalāne meñ