chalte rahne ke liye dil meñ gumāñ koī to ho

be-natīja hī sahī par imtihāñ koī to ho

āsmānoñ ke sitam sahtī haiñ is ke bāvajūd

sab zamīneñ chāhtī haiñ āsmāñ koī to ho

mehrbānoñ hī se bach kar aa.e the tum dasht meñ

ab yahāñ bhī lag rahā hai mehrbāñ koī to ho

qahqahoñ ko yaad rakhtī hī nahīñ duniyā kabhī

is liye dukh kī bhī pyāre dāstāñ koī to ho

kar rahā huuñ maiñ daraḳhtoñ se musalsal guftugū

is ghane jañgal meñ 'dānish' ham-zabāñ koī to ho