tum apne aap par ehsān kyuuñ nahīñ karte
kiyā hai ishq to elaan kyuuñ nahīñ karte
sajā.e phirte ho mahfil na jaane kis kis kī
kabhī parindoñ ko mehmān kyuuñ nahīñ karte
vo dekhte hī nahīñ jo hai manzaroñ se alag
kabhī nigāh ko hairān kyuuñ nahīñ karte
purānī samtoñ meñ chalne kī sab ko aadat hai
na.ī dishāoñ kā vo dhyān kyuuñ nahīñ karte
bas ik charāġh ke bujhne se bujh ga.e 'dānish'
tum āñdhiy.oñ ko pareshān kyuuñ nahīñ karte